Gwrandawiad camymddwyn ar gyfer cyn swyddog a ganfuwyd yn euog o gamddefnyddio cyfrifiaduron

Cynhaliwyd Gwrandawiad Camymddwyn Cyflym heddiw ym Mhencadlys Heddlu Gogledd Cymru, Bae Colwyn.

Ystyriodd y gwrandawiad ymddygiad y cyn Dditectif Arolygydd Emma Gardner ar ôl iddi gael ei heuogfarnu am gamddefnyddio cyfrifiaduron. Ymddiswyddodd Gardner o Heddlu Gogledd Cymru yn ystod yr achos cyfreithiol yn ymwneud â'r mater.

Heddiw, canfu'r gwrandawiad, na wnaeth y cyn swyddog ei fynychu, fod yr honiad wedi'i brofi a bod ei gweithredoedd yn gyfystyr â Chamymddwyn Difrifol. Pe bai hi'n dal i fod yn swyddog heddlu yn gwasanaethu, byddai wedi cael ei diswyddo heb rybudd. 

Yn ogystal, bydd ei henw yn cael ei roi ar Restr Unigolion Gwaharddedig y Coleg Plismona, gan ei hatal rhag gweithio o fewn plismona yn y dyfodol. 

Ar 8 Gorffennaf 2026, cafwyd Gardner yn euog yn Llys y Goron Caernarfon o drosedd yn groes i Ddeddf Camddefnyddio Cyfrifiaduron 1990 yn dilyn achos llys. Mae disgwyl iddi gael ei dedfrydu ar 11 Medi 2026.

Wrth siarad ar ôl y gwrandawiad, dywedodd y Prif Gwnstabl Amanda Blakeman KPM:

"Ymddiriedir yn swyddogion a staff yr heddlu hefo mynediad at wybodaeth sensitif iawn, ac mae'r cyhoedd yn iawn yn disgwyl i'r wybodaeth honno gael ei defnyddio at ddibenion plismona cyfreithlon yn unig.

Mae'r safonau a ddisgwylir gan y rhai sy'n gweithio ym maes plismona yn uchel iawn, ac mae cynnal hyder y cyhoedd yn sylfaenol i bopeth a wnawn ni.

Roedd yr achos hwn yn ymwneud hefo ymddygiad troseddol a oedd yn disgyn ymhell yn is na'r safonau a ddisgwylir gan swyddog heddlu. Mae camddefnyddio systemau a gwybodaeth yr heddlu yn tanseilio'r ymddiriedaeth y mae'r cyhoedd yn ei roi mewn plismona, ac felly mae'n iawn fod camau cadarn wedi'u cymryd.

Mae Heddlu Gogledd Cymru yn parhau i fod yn ymrwymedig i gynnal y safonau proffesiynol uchaf a sicrhau bod swyddogion, staff a gwirfoddolwyr yn cael eu dal yn atebol pan nad ydy'r safonau hynny'n cael eu bodloni."