Sut mae troseddwyr yn camfanteisio ar eu dioddefwyr
Yn yr adran hon:
| 1. Caethwasiaeth fodern a masnachu pobl |
| 2. Sut allwch chi adnabod caethwasiaeth fodern a masnachu pobl |
| 2. Sut mae troseddwyr yn camfanteisio ar eu dioddefwyr |
| 3. Riportiwch gaethwasiaeth fodern a fasnachu pobl |
| 4. Cymorth i ddioddefwyr caethwasiaeth fodern a masnachu pobl |
Gall y ffyrdd y camfanteisir ar ddioddefwyr caethwasiaeth fodern neu fasnachu pobl amrywio. Efallai na fyddant yn cyd-fynd â’r stereoteip o bobl yn cael eu gorfodi i weithio mewn caeau neu mewn bariau ewinedd.
Os ydych chi’n credu bod rhywun yn dioddef camfanteisio mewn unrhyw un o’r ffyrdd hyn, neu os oes rhywun yn camfanteisio arnoch chi mewn unrhyw un o’r ffyrdd hyn, gallwch chi ei riportio wrthym.
Camfanteisio troseddol
Dyma pan fydd dioddefwyr caethwasiaeth fodern neu fasnachu pobl yn cael eu gorfodi, eu bygwth neu eu twyllo i gyflawni troseddau fel:
- dwyn o siopau
- pigo pocedi
- cardota trefnedig
- dwyn tanwydd o geir
- troseddau ariannol, gan gynnwys twyll budd-daliadau
- priodas ffug
Cyffuriau
Mae rhai dioddefwyr yn cael eu gorfodi i weithio fel tyfwyr canabis. Defnyddir eraill i ddosbarthu neu werthu cyffuriau.
Mae llinellau cyffuriau yn un math o gamfanteisio troseddol. Dyma lle mae pobl agored i niwed, yn aml plant, yn cael eu defnyddio i gario cyffuriau o ddinasoedd i’w gwerthu mewn trefi cyfagos a chefn gwlad.
Darganfod mwy am linellau cyffuriau.
Camfanteisio rhywiol
Mae dioddefwyr yn cael eu gorfodi neu eu rhoi dan bwysau i wneud gwaith rhyw neu i gyflawni gweithredoedd rhywiol tra’n cael eu rheoli gan eu camfanteisiwr. Mae hyn yn cynnwys gwaith hebrwng, pornograffi neu greu delweddau anweddus o blant.
Menywod a phlant yw’r rhan fwyaf o ddioddefwyr camfanteisio rhywiol, ond gall effeithio ar ddynion hefyd.
Cynaeafu organau
Mae dioddefwyr yn cael eu symud o un lle i’r llall gan eu camfanteisiwr i gael rhan o’r corff wedi’i dynnu allan. Mae prynu neu werthu organau dynol ar gyfer trawsblannu yn anghyfreithlon. Mae hefyd yn anghyfreithlon os yw’r camfanteisiwr yn byw yn y DU ond yn trefnu i’r organ gael ei thynnu dramor.
Yr organau mwyaf cyffredin sy’n rhan o hyn yw’r afu/iau a’r aren.
Masnachu plant
Mae pobl ifanc yn cael eu twyllo i deithio i’r DU gan feddwl y byddant yn mynd i’r ysgol neu’n cael swyddi yma.
Pan fyddant yn cyrraedd, maent yn darganfod eu bod wedi cael eu twyllo ac yn cael eu gorfodi i weithio mewn bwytai, helpu gyda thasgau neu ddwyn. Yn aml ni chaniateir iddynt fynd i’r ysgol. Weithiau maent yn cael eu gorfodi i weithio yn y diwydiant rhyw.
Hyd yn oed os nad yw plentyn sydd wedi’i fasnachu yn cael ei orfodi neu ei fygwth i gyflawni trosedd, mae’n dal yn dioddef camfanteisio oherwydd ei oedran.